• 26 Nov 2025

Bakı Avrasiya Universitetində (BAAU) İcbari Tibbi Sığorta üzrə Dövlət Agentliyi və Universitetin Karyera və Təlim Mərkəzinin birgə təşkilatçılığı ilə “İcbari tibbi sığorta” mövzusunda maarifləndirici təlim keçirilib. Tədbirdə universitetin professor-müəllim heyəti, inzibati əməkdaşları və tələbələr iştirak ediblər.

 Təlimin məqsədi iştirakçıların icbari tibbi sığorta sistemi, ödəniş mexanizmləri, təminat paketləri, həmçinin müqavilə bağlanmış dövlət və özəl tibb müəssisələrində sığorta xidmətlərindən istifadə qaydaları barədə məlumatlandırılması olub.

 Tədbirdə açılış nitqi ilə çıxış edən Beynəlxalq əlaqələr üzrə prorektor, dosent Sevda Rzayeva təlimin əhəmiyyətindən danışıb, ölkədə icbari tibbi sığorta sisteminin tətbiqinin vətəndaşların sağlamlıq imkanlarının genişlənməsindəki rolunu vurğulayıb.

 Daha sonra İcbari Tibbi Sığorta üzrə Dövlət Agentliyinin İctimaiyyətlə əlaqələr şöbəsinin məsləhətçisi Ləman Mollayeva təqdimatla çıxış edib. O, icbari tibbi sığorta sistemi, xidmətlər zərfi, təminata alınan tibbi xidmətlər, agentliyin müqavilə bağladığı tibb müəssisələri və sığorta xidmətlərindən səmərəli istifadə qaydaları barədə ətraflı məlumat verib.

 Çıxış zamanı iştirakçılara sağlam həyat tərzinin təşviqi, profilaktik tibbi müayinələrin əhəmiyyəti və xəstəliklərin qarşısının alınması ilə bağlı faydalı tövsiyələr də təqdim olunub.

Təlim interaktiv şəkildə davam edib, iştirakçıların sualları cavablandırılıb və icbari tibbi sığorta sisteminin vətəndaşlara təqdim etdiyi imkanlar ətrafında fikir mübadiləsi aparılıb.

 İcbari Tibbi Sığorta üzrə Dövlət Agentliyi və TƏBİB tərəfindən həyata keçirilən bu kimi maarifləndirici tədbirlər əhalinin tibbi sığorta sistemi barədə məlumatlılığının artırılmasına, eləcə də sağlam həyat tərzinin təşviqinə mühüm töhfə verir.