• 21 Feb 2025

Bakı Avrasiya Universiteti Karyera və Təlim Mərkəzi ilə İnnab Business School arasında gələcək əməkdaşlıq perspektivlərini müzakirə etmək məqsədilə görüş keçirilib. Görüşdə BAAU Karyera və Təlim Mərkəzinin rəhbəri Natiq Xəlilov, mərkəzin mütəxəssisi Aydan Xankişiyeva, həmçinin İnnab Business School şirkətinin nümayəndələri iştirak ediblər.

Görüş zamanı Natiq Xəlilov universitetin tələbələrin peşəkar inkişafına verdiyi dəstək, həyata keçirilən karyera yönümlü proqramlar və təlim imkanları barədə geniş məlumat verib. O, gənclərin əmək bazarına daha hazırlıqlı daxil olması üçün universitet və təlim şirkətləri arasında əməkdaşlığın vacibliyini vurğulayıb.

İnnab Business School nümayəndələri öz fəaliyyət istiqamətləri, gənclər və müəllimlər üçün təqdim etdikləri inkişaf proqramları və təcrübə imkanları barədə ətraflı məlumat veriblər. Onlar tələbələrin peşəkar bacarıqlarını artırmaq və iş dünyasına daha yaxşı inteqrasiya etmələri üçün birgə fəaliyyətin vacibliyini qeyd ediblər.

Görüş çərçivəsində aşağıdakı əməkdaşlıq istiqamətləri müzakirə olunub:

Tələbələr üçün birgə təlim və seminarların təşkili;
Praktiki bacarıqların inkişafına yönəlmiş master-klassların keçirilməsi;
Tələbələr üçün mentorluq və təcrübə proqramlarının həyata keçirilməsi.

Görüşün sonunda tərəflər əməkdaşlığın inkişafı üçün konkret fəaliyyət planının hazırlanması və birgə layihələrin icrası istiqamətində razılığa gəliblər.

Bu əməkdaşlıq çərçivəsində tələbələrin peşəkar inkişafı üçün daha geniş imkanlar yaradılacaq və onların iş dünyasına inteqrasiyası üçün yeni perspektivlər açılacaq.